O Mercado da Praza de Lugo e Los Ángeles GAS alíanse para fomentar o pequeno comercio
A Asociación de Placeiros Mercado Praza de Lugo e Los Ángeles Gas presentaban esta mañá un convenio que permitirá aos placeiros ofrecer descontos en reposición aos compradores, fomentando o pequeno comercio nestas datas do Nadal.
É, probablemente, o mercado máis emblemático da Coruña, cunha localización privilexiada, unha historia centenaria detrás (111 anos neste 2021) e un xénero excepcional. Pero, se os clientes necesitaban algún outro argumento para gozar do Mercado Praza de Lugo, a partir de agora contarán cun que lles facilitará e abaratará o desprazamento.
A Asociación de Placeiros do Mercado Praza de Lugo e Los Ángeles Gas presentaron hoxe un convenio de colaboración que permitirá aos placeiros ofrecer aos seus clientes descontos na reposición nas gasolineiras que o grupo ten na área da Coruña: a coñecida estación dos Xardíns de Méndez Núñez, a só uns metros do mercado, e a situada en Oleiros, xunto a Louzao.
10.000 vales de desconto de 0,05€ por litro enchido que os placeiros entregarán aos seus clientes polas súas compras, desde mañá mércores e ata esgotar existencias, e que buscan promover a compra no pequeno comercio nunhas datas nas que poñemos especial coidado e interese en que a nosa despensa e a nosa mesa estean ben variadas.
“Hai moitos clientes do mercado que veñen desde outros barrios e mesmo outros concellos, e para nós é estupendo poder premiar a súa fidelidade e axudarlles a que a súa compra sexa máis beneficiosa grazas a este acordo”, apunta Pedro Dafonte, presidente da Asociación de Placeiros do Mercado Praza de Lugo, “especialmente cando é froito dun convenio cunha peme como Los Ángeles Gas, que coñece a importancia do pequeno comercio e do trato directo, como nós”.
Pola súa banda Fernando Parra, responsable de Los Ángeles Gas, destacaba a importancia que a compañía outorga a colaborar cos pequenos comerciantes “somos unha compañía que desde hai case 50 anos dá especial importancia á atencion personalizada ao cliente e o que isto implica na xeración de postos de traballo. Ideas nas que sentimos moi identificados co mercado local e o concepto da praza de abastos”, explica.
Válelos de desconto empezarán a repartirse entre os clientes da praza a partir de mañá, mércores 15 de decembro, buscando animar as compras de proximidade e fomentar o apoio aos pequenos comerciantes do mercado e ás pemes da área.
